網頁

2014年2月28日星期五

實用俄語學習 app 推介 (1)

唔知大家有冇留意到近期成日都好似有俄羅斯嘅消息。自從普京再揸正,到斯諾登 (Snowden) 從香港離開然後著草到俄羅斯,再到啱啱完成嘅索契冬季奧運 (Sochi 2014) ,再到近期因烏克蘭局勢而想插手嘅俄政府,似乎俄羅斯新聞真係一浪接一浪。

咁唔知大家又有冇興趣學吓俄語呢?維京人一向興趣多多,學 language 都唔例外,乜都想了解一下。見俄羅斯咁紅都有興趣了解下俄語嘅皮毛。

喺咁多個香港及台灣人鐘意學嘅歐洲語言裡面,俄文真係好似相對比較少人學。而相對嘅學習資料亦冇英語、德語、法語、意大利語等咁多。

咁如果唔想報 course 住,但又想了解俄語嘅話可以點算呢?唔駛擔心,維京人都做咗少少嘅資料搜集,搵咗幾個俄語 app 試過一下。有啲要錢有啲唔駛錢,大家按自己需要去 download 啦。

Ура! (Cheers 嘅俄文)


Russian Alphabet 
















直接簡單字母卡,俄語 001 必備!有發音、學習筆順、quiz 功能。不過淨係得大階。(雖然俄文大部份大細階都係一樣樣)

可以喺 App Store search "Russian Alphabet" 或直接點擊呢度去 App Store download。


Russian Alphabet! 
















另一個俄文字母 app。有大細階同發音,唔錯。

點擊呢度去App Store 相關頁面及下載。


Russian Numbers
















同 RussianAlphabet! 同出一系。學俄文數字寫法及發音,從 0 到 1,000,000!

點擊呢度去 App Store 相關頁面及下載。



暫時介紹住三個先。下次繼續!

想留意維京人嘅即時推介,可以去維京人 Twitter 頁面吖。

Cheers~

#Russian #俄語 #俄文 #русский

2014年2月23日星期日

係時候用 iPad 感受吓玩冰壺嘅樂趣!

索契冬季奧運會 (Sochi 2014) 今日完結,相信各位都仲係意猶未盡,仲回味緊金妍兒淺田真央花式溜冰滑鐵盧、啱啱加拿大攞咗冰上曲棍球男子冠軍、仲有大家睇到上癮嘅冰壺 (Curling)!

冰壺除咗考驗運動員嘅體力外,其實都仲好考策略同埋團隊精神。喺網上呢兩日都有人 post喺屋企用地拖同水桶嚟模彷玩冰壺,真係好鬼過癮。

喺好似香港呢啲地少人多嘅城市,其實要玩一場冰壺都唔係咁容易。因為玩一場冰壺,基本上成個冰場都俾你霸晒,租場相信都有一定嘅費用。

咁上過玩冰壺癮,原來又唔係冇辦法嘅!原來 iPhone 同 iPad 都有好多呢類 app。維京人強烈推介其中一個叫 Curling3D HD 嘅 iPhone/ iPad app!佢 support 多人對戰,仲有 Chess On Ice 等策略,仲模擬冬奧會各國家隊嘅進軍玩法,加上 3D 效果同唔錯嘅 sound effect,真係玩到大呼過癮!

各位要 download,可以去 App Store search Curling3D HD,又或者直接點呢度去佢 App Store 個 page download!Enjoy~










2014年2月12日星期三

極度沉迷 - The Blockheads

相信呢度有好多朋友都玩過 MineCraft。玩家要不斷搵唔同嘅原材料,包括木材、礦石、動物皮等等,然後製造出唔同的工具、道具、用品等,再繼而創造出自已想創造嘅屋同世界。成個世界任由你創造,想造乜就造乜。呢個 game 相信一早已經俘虜咗唔少人嘅工餘課餘時間。

MineCraft 另一樣好嘅地方係,佢喺唔同嘅 platform 都可以玩到。包括 PC、Mac、iOS、Android 甚至 Raspberry Pi 上面都玩到!

今次同大家介紹嘅,其實係一個類似 MineCraft 嘅 2D game,叫作 The Blockheads~

Blockheads 嘅玩法其實真係同 MineCraft 一模一樣。不過 2D 其實容易上手過 MineCraft 嘅 3D 好多。 

遊戲一開始喺係一個 system randomly generate 嘅世界,有山、有水、有森林、有沙漠、更有地底洞穴。 Blockhead 可以向左或者向右行,圍繞地球走一圈。要留意你去到深海可能要食海橾吸氧氣、去到天寒地凍嘅地方記得要搵件皮草著吓、行到攰記得要 craft 張牀嚟瞓下。 

要整咁多工具,當然記得要不斷掘地。掘吓掘吓甚至會搵到鑽石同黃金等。如果你巴之閉嘅話甚至整個土豪金皇宮出嚟嘆吓都得! 

遊戲中玩家亦可以通過 Time Crystal 去加快自己夢想世界的建設速度、甚至創做更多嘅 Blockheads,從而發展出一個多姿多彩嘅虛擬世界。

維京人甚至整咗一條橫誇大半個世界嘅鐵路,真係掘到我儍!

 Enjoy the game! Cheers~






2014年2月8日星期六

維京人又再浦頭鳥~

原來唔經唔覺,已經有成三年幾冇 update 過呢個 blog。原因其實好簡單,「三個字」:懶到出汁! 其實都唔係咁懶嘅,只不過維京人近呢三年幾公司不停有嘢做,個個月都要出 trip,所以咪冇抽時間寫吓 blog 咁囉。 講開又講,喺呢幾年入面,mobile 嘅世界真係日新月異。2011年出咗 iPad 之後大家就更加機不離手。咁當然維京人都唔例外啦,基本上冇咗 iPhone 同 iPad 係完全生存唔到㖭。 最奇怪嘅係:有咁多身邊嘅人擁有一個或者多過一個嘅 device, 原來好多人都係攞嚟睇下網頁,打下機咁啫。甚至近日有朋友問我點樣喺 iOS 關閉開多咗嘅 app!(!?) 攪到維京人好想將有限嘅用 app 經驗 share 吓俾大家。 That's why 又 pick up 番寫 blog 嘅諗法。大家得閒上嚟望望啦。
iPhone, iPhone Blog, iPhone App, App Store, Apple, iTunes, iTunes Store, mobile phone