買 iPhone 行貨可以唔駛幫襯 3 香港

想買 iPhone 3G 而家下又唔係用緊 3 香港台嘅朋友，如果你唔想轉台接受綑綁式銷售，又或者你用緊個台仲簽緊約，家下有好消息喇！Apple 己經宣佈可以喺佢個 official web site Apple Online Store 訂購，各位只需上網自行購買即可。

喺 Apple Online Shop 買嘅 iPhone 3G，無論你用嘅係咩電訊商都冇所謂，唔駛解鎖唔駛簽約，只要簡單地將張 Sim Card 插落去部機度，然後通過 iTunes 做番個 activation 即可使用。

咦？咪住，價錢又點計先？老實講，你估真係好似喺美國宣傳時嘅 $199 美金咁筍咩？話晒美國經濟唔好先要咁平啫，香港嘛，冇穿冇爛，唔會賣咁平咯。8GB 黑色賣 HK$ 5,400，而 16GB 不論黑色白色，就要 HK$6,200。




其實計番條數，如果你一個月電話費一向都唔平，數據用量又多，建議你都係接受 3　香港呢下綑綁式銷售反而有著數。揀最貴嘅月費約 HK$500 一個月，數據轉送任用，機價都係百零蚊。 Total Cost 其實可能仲平。

咁當然，Apple 都有行貨賣，點都係好消息嚟嘅，始終多個選擇。正所謂有得揀，先至係老板嘛。小弟一向都係幫襯開殊嘜通，仲用咗 N 年咁耐㖭。不過最後都係為咗部 iPhone 轉咗台。家下多個選擇，如果你仲未出 iPhone，係時候認真考慮出番部喇！

Puzzloop：令人沉迷

如果你問維京人有乜好嘅 iPhone game 推介，就真係不可不提 Puzzloop 呢個 game。咁多 iPhone game 入面，可以話呢個係較為令人沉迷嘅。

乜嘢係 Puzzloop？其實你個 game 嘅玩法好簡單。發射站喺中心，圍住佢嘅有一個或多個圈圈（路軌），其實有 D 似蚊香。唔同顏色嘅波波會喺最外面嘅圈圈沿住路軌慢慢咁轉入去發射台嘅中心。玩家需要用手指喺個 screen 指定方向，喺發射台將 load 出嚟嘅顏色波發射出去，當射出去嘅波波接觸到連續三個或以上相同顏色嘅波波，則接觸到嘅相同顏色波波就會消失，否則發射出去嘅波波就會停留喺條路軌度，會同其他波波一樣沿住路軌轉入圓心。

佢分兩個 mode，一個係 Stage Mode，另一個係 Endless Mode。


Stage Mode 共有五個階段，每個階段再分為五級，總共有 25 版俾你挑戰。 每版都會出一定數量嘅波，清晒佢就可以過版。Endless Mode 就會出無限波波，到一定難度就升呢，小弟最勁就玩到 level 52，隻手真係玩到有少少抽筋！

無論係 Stage Mode 定係 Endless Mode，只要 D 波波接觸到發射台嘅圓心就為之輸。


呢個 game graphics 做得好好，聲效又正，攪到我家下每晚都要玩起碼半個鐘先捨得放低部 iPhone。而且價錢合理，都只係 $7.99。買本日本雜誌都係差唔多咁嘅價錢，但可以成日玩，同埋玩一段唔短嘅時間。絕對可以考慮。

Full version 可以喺 iTunes search “Puzzloop”搵到，又或者 click 下呢個 link。

佢仲有 Free Version，於 iTunes search “Puzzloop Free” 即可。試玩過我驚你最後都好似我一樣，買咗 Full Version。

iPhone 都可以 screen capture？

係 ga，iPhone 原來都可以做到 screen capture 。大家只要先按住 Home 嗰粒 button 唔放，然後再輕輕咁按一按個 　Sleep/Wake button　就可以做到。當你輕按 Sleep/Wake button 後，個畫面會反白同埋你會聽到　“咔嚓”　一聲，跟住你就可以喺 Photos 入面嘅 Camera Roll 呢個 album 搵得番。

例子：



係咪好爽呢？

iPhone Software 2.1，一定要 upgrade

維京人喺７月買嘅 iPhone，OS 個 version 係 2.0 嘅。不過好快就出咗 2.01，然後就出咗 2.02。唔夠一陣就要 update 同 upgrade, 好明顯就係原本推出嘅 iPhone 3G 問題多多！如果一出嗰個 version 係正嘅話，就唔駛 update 得咁頻密啦！

根據小弟嘅經驗，由 2.0 到 2.02，真係唔覺有咩分別。以下係小弟用呢幾個版本嘅慘痛經驗，總之就係用得極之唔爽啦！

• 唔爽１： backup 超慢，試過一次 backup 要成四個鐘，真係嚇死人；
• 唔爽２： 成日死機！
• 唔爽３： 當 sync 緊機或裝緊 Apps 嘅時候有電話嚟，講完電話會死機！
• 唔爽４： 最慘係死完機後， reboot 完部機只係見到 Apple 個 logo，要用特定嘅方法重裝先可以還原。小弟用 2.01 嘅 version 時，最痛苦係試過一個禮拜內重裝部機 4 次，你都咪話唔慘情！

維京人喺度強烈呼籲，如果你部機冇 jailbreak 到，如果你部機係原裝 3 香港行貨機，請馬上 upgrade 部 iPhone software 去到 version 2.1 啦！原因如下：

• 爽死 １： backup 時間如 Apple 網頁所講，有個 dramatic change！家下備份時間已經縮到唔駛　10　分鐘！爽死！
• 爽死 ２： 裝 Apps 時有電話到，講完電話後會自動繼續裝，唔會死機。

淨係呢兩樣爽死，都已經要 upgrade 啦。咁當然，Apple 仲話今期嘅 upgrade 有以下嘅改善：

• 減少來電 dropped calls；
• 電池壽命便耐用；
• 改善電郵的隠定性；
• 更快安裝第三方軟件；
• 當安裝第三方軟件時，減少 hang 機死機；
• 改善文本信息的表現；
• 聯絡人 load 得更快；
• 加強 3G 信號接收準確度；
• 短信未接會重覆 2 次提示；
• 可以選擇１0次輪錯開機密碼時消毁數據；
• 創建 Genius 播放清單；

睇今期電腦廣場，仲有以下隱藏改善：

• 安裝 Apps 家下可以按一下該 icon 暫停；
• 睇唔晒聽唔晒嘅 PodCast 同埋 video，於清單上左手面會有半個藍色波波提示；
• 有新 SMS，顯示時會隠藏咗 sender；
• 查看舊 SMS 短信若同一個 conversion 多過 50 個，舊嘅會自動收起，要點 "Load Earlier Message" 先會顯示埋太舊嘅信息。
• 打網址時按著 ".COM"，會有多幾個選擇，如 .HK、 .TW、.NET 等等。

So, 提議大家可以考慮安裝。

開張大吉

iPhone 3G 喺７月１１日喺香港登陸，維京人喺7月１４號就己經出咗機囉，諗番起當時嘅情況都非常興奮。

家咁玩咗差唔多成兩個多月，仲越玩越鐘意㖭，希望可以將自己僅有嘅心得同埋發掘到嘅功能籍住呢個 blog 同大家 share 吓咁啦。

另外，如果各位有咩問題，都可以 email 俾我。小弟會儘最大嘅努力去搵出答案。

是為此 blog 第一篇。開張大吉！