六合彩結果馬上送到

生意淡薄，不如賭博。香港人其中最鐘意參與嘅賭博莫過於係買六合彩。冀望可以以小博大，刀仔据大樹嘛。

維京人話過要講多 D 本地 App，喺 Hong Kong 嘅 App Store 就可以搵到兩款 App 係要嚟提供六合彩結果。佢地分別係 HK Mark Six (Hong Kong) (唔係好明點解叫咗 HK 仲要用個括號括住個 Hong Kong)　同埋 QMark6。

呢兩個 App 都同時可以顯示最新六合彩結果，包括攪出嘅六位數字同埋特別號碼。

HK Mark Six (Hong Kong) 可以顯示頭獎嘅派彩，但就冇講頭獎有幾注中，以及二獎三獎都冇顯示。不過佢有個「幸運一拉」嘅功能，拉一拉即可 generate 六個心水號碼出嚟，有興趣嘅朋友可以跟住佢買下期。

　　　

QMark6 則可以顯示埋頭二三獎有幾多注中同埋相對應嘅派彩。據作者喺佢嘅 Application Description 所顯示，下個版本將會有過往十期攪珠結果，同埋下期攪珠日子同埋累積獎金，非常實用。



想下載 HK Mark Six (Hong Kong)，可以以關鍵字 "HK Mark Six" 喺 Hong Kong App Store 作搜尋，或 click 呢度。想下載 QMark6，關鍵字當然就係 "QMark6"，或直接 click 呢度。

Urban Tycoon：過份簡單版 SimCity

近呢幾日留意下講 iPhone 嘅 Blog，唔係講 iPhone 2.2，就係講傳 EA 會出 SimCity iPhone 版。據聞仲話整個改版動作已接近完成，將會於十二月推出。如果係真嘅話，維京人肯定第一時間 download 落嚟玩，因為小弟係超級 SimCity 迷！

就係因為太鐘意玩模擬城市喇，所以小弟亦喺 App Store 搵到個擬似 SimCity 嘅 game: Urban Tycoon。維京人喺度唔係推介你 download 呢個 game，而只係想話俾你知 App Store 真係乜都有。呢個 game 好平，只係 US$1.99，不過功能亦同價錢成正比。



個 game 嘅玩法好簡單，一個地圖，然後你可以喺地圖上放低唔同嘅建築物，例如 hotdog stand 呀，news stand 呀，甚至而要比較高價錢嘅學校、公園、住宅、Office 大樓、酒店等。當完成擺放建築物後，只要按下 "Play"，則完成一 round，咁你擺放嘅建築物會交稅，你個城市就開始賺錢。然後又擺放建築物，又按 "Play"，又完成一 round ......

呢個 game 你可以調稅率，有 Railway Station，但冇得起路軌、起馬路、起地鐵、起單軌火車；唔需要接駁電力、水管，亦唔需要倒垃圾；擺放建築物亦唔需要考慮周圍環境，因為有冇污染呢個 game 亦冇反映；冇警局冇消防局冇醫院！超級簡單。呀，唔係，係過份簡單先啱。



呢個 game 適合等 lift 嘅時候攞嚟 kill time。家下真係越嚟越期待 SimCity iPhone 版。

Anyway，想玩呢個 game 嘅朋友，可以去 App Store 以 "Urban Tycoon" 作搜尋，或 click 呢度。

iPhone 2.2 Software Update 出咗喇！

最新消息：期待已久嘅 iPhone 2.2 Software Update 已經出咗喇，真係望穿秋水！之前嘅 iPhone 2.1 （全名應該叫做 iPhone 2.1 Software Update）大幅顯著改善咗 iPhone 同電腦 sync 機超級慢嘅問題，所以小弟都對 2.2 抱住好大嘅期望。

維京人身先士卒，已經第一時間 install 咗同埋試下先。之前 expect 嘅 copy & paste function 雖然仲未做到，但整體嚟講都係 OK 嘅。

據 Apple 網頁所講，今次主要有七大更新：

• Maps 今次嘅改善比較多，亦係今次 update 嘅主要 selling point。改善包括新增 Google Street View、公共交通、步行方向等；另外，dropped pins 可以顯示地址，而且仲可以用 email 同 D 朋友仔 share location 㖭。
• 減少撥出失敗同埋通話遺失。維京人試咗成日，暫時未發現有之前一個版本有通話遺失（即講講下電話無厘頭斷線）嘅情況，唔錯。不過試一日未夠，要繼續密切留意先得。
• Mail 功能增強，包括解決個別電郵排程問題，而且有更佳嘅橫式 HTML 電郵。
• 可以喺 iTunes 直接 download Podcast。呢個功能其實唔錯，下載 Podcast 唔需要將 iPhone 連線至電腦下載。不過由於香港冇 iTunes Store，如果你上次連接 iTunes 時使用香港區域，iPhone 亦會默認為香港，所以呢個功能就用唔到咯，除非你上次用部 iPhone 連接 iTunes 係使用一 D 有 iTunes Store （例如美國、日本等）嘅區域啦。
• Safari 效能更佳更穩定。使用 Safari 成日無啦啦跳返出去 home screen 可以話係之前幾個版本俾人投訴得最多嘅一個問題。維京人今日試過，感覺良好。好似通話遺失一樣，試一日未夠，要繼續密切留意。
• 按下 home screen button 即返去第一個主屏首頁。呢個功能維京人奇怪點解之前嗰幾個版本做唔到。家下終於有呢個 function，開心！
• 開啟或關閉 Auto-correction。

So far 覺得 2.2 都唔錯，亦冇咩其他大問題。建議 download。

用 iPhone 搵食

呢排 Hong Kong App Store 多咗好多本地 Apps，而且好多都好實用㖭。維京人會喺嚟緊呢幾個星期講多 D 呢類 Apps，以支持本地制作嘛。大家得閒記得多 D 上嚟。

民以食為天，平時睇飲食雜誌介紹或者用開 Internet 搵食肆嘅朋友，家下用 iPhone 都可以搵食。其中兩款比較多人 download 嘅有 GPS FoodEasy 同埋 GoHan (御飯情報)，兩個都係免費，值得下載使用。

基本上呢兩個軟件都可以按地區同埋菜色種類去搜索，有埋地圖，而且 click 一下個電話即可致電有關嘅食肆，超方便。

咁呢兩個 App 都有唔同嘅地方嘅。先講上月中左右登場嘅 GPS FoodEasy 啦。你可以將你鐘意嘅食肆 bookmark；而 D bookmark 仲可以做埋 backup，萬一部 iPhone 「神」咗，都可以 restore 番，都算有心。另外，你仲可以將你去過嘅餐廳用 iPhone 影埋相，即時上載分享食評同埋圖片，真係頂癮。



GPS FoodEasy 喺 App Store 嘅評價老實講亦唔係話十全十美，主要係佢嘅界面唔係咁好用，成日要 click 呢樣 click 嗰樣去選擇，有少少麻煩。而食肆數目約15000間，對大部份用戶嚟講亦未算話特別齊，好多屋企附近嘅餐廳都搵唔到。

至於另一款軟件係１１月中推出嘅 GoHan (御飯情報)，小弟就覺得可以用「好正！」嚟形容。界面靚仔，唔同國家／地區嘅菜式以國旗區旗顯示，好清楚。另外，仲可以對各食肆俾分，而且有「匯報人流」嘅功能，非常好玩。睇番 iPhone 網友喺 App Store 嘅反應，有四粒星，非常唔錯。





除咗以上兩個 Local App 外，來路 App Locly 亦係一個唔錯嘅選擇。佢除咗幫你搵食外，亦可以通過佢搵你位置附近嘅超級市場、咖啡室、酒吧、銀行、油站、酒店等，亦可以睇下有乜 local event，甚至關於你所在地嘅維基百科文章亦可以睇埋。只要你 click 呢個 App，佢會以 AGPS 搵你嘅位置，然後就彈出個 Safari 出嚟，一次過列晒相關搜尋分類。呢個 App 係英文版，但真係幾方便。



想下載以上軟件？可以以相關軟件名稱喺 Hong Kong App Store 搜尋即可。或者可以 click 以下連結：

• GPS Food Easy
• GoHan
• Locly

用 iPhone 玩 online game

iPhone 嘅功能越玩越刁鑽，亦越嚟越好玩。近排多咗 iPhone game developer 開發 online game，連 Fortune 亦對此有所留意，各位可以 click 去呢度睇下。佢介紹咗以下呢段片，真係引死人。期待快 D 有類似嘅好 game 可以玩。

iBowl：玩 Wii 一樣

天氣開始轉涼，不如做吓運動熱下個身啦。今次想介紹一下一個免費嘅 game 俾各位，叫做 iBowl。名符其實，就係用 iPhone 打保齡球！

玩法非常簡單。打開個 app，會出現玩保齡球條 lane，前面已經擺好十個樽等你碌。按下中間個 BOWL 按鈕唔好放，然後捉實你部 iPhone 「fing」出去，同時放開粒 BOWL button，咁個波就會好似真係打保齡球咁碌出去，睇你射跌幾多個樽。

唔明點玩？唔緊要，YouTube 大把 video 示範，睇下面呢段都得。



係咪好 cool 呢！由於 iPhone 內置 accelerometer，可以感覺到你部機嘅擺動，所以可以做到玩 Wii 一樣嘅效果。希望可以越嚟越多呢類 game 啦。

又等維京人玩番局俾睇下：



不過玩嘅時候真係要非常小心，如果玩到興起一個唔覺意將部 iPhone 飛咗出去就真係喊都無謂。咪話維京人冇提醒你。

iBowl 同系列仲有 iBaseball 同埋 iGolf，有興趣嘅可以 download 埋嚟玩下。iBowl 可以喺 App Store 以「iBowl」關鍵字作搜尋，又或者 click 呢度。

Let's take a ride!

上次介紹過遊日必備嘅一款鐵路查詢軟件，原來近期本地彊亦唔執輸，亦有一款為搭港鐵而設嘅軟件「MTR Ride」。成為近期長據香港 App Store Paid App 排行榜冠軍。

選擇港鐵起點及終點站，MTR App 就會顯示乘車時間，最短路線以及車費。點取起點 S 圖案或終點 E 圖案，會顯示港鐵路線圖，各位可以放大地圖去搵出想要車站。另外，佢亦可顯示成人、特惠、八達通成人或八達通特惠車費，無需上網，支援中文及英文。





呢個 App 價錢算係幾合理，$0.99美元。總括嚟講佢已經做到佢話做到嘅嘢。不過人都係貪心嘅，維京人希望下個 version 可以改善下以下幾點就正喇，就算價錢略為調整都可以考慮：

1) 能夠顯示頭尾班車開車時間，會對我哋呢 D 夜鬼有幫助；
2) 佢只顯示自認為最短嘅路線。如果好似日本嘅「 Y！路線」或者「駅探」咁，可以顯示唔同轉車路線嘅選擇會 flexible。
3) 機場快線及輕鐵都屬於港鐵公司嘅，有埋就當然更好啦！
4) 建議加埋每個站嘅出口位置同名稱，同埋站內地圖。約人話喺邊個邊個出口等都方便 D。
5) 呢個 App 嘅 target customer 亦包括遊客，有埋各站附近有咩好玩嘅地方介紹就仲正喇。
6) 對遊客嚟講，亦未必知道東鐵線頭等係原有車價 X 2，所以有埋呢個 information都唔錯。

其實港鐵公司或旅遊發展局係咪要考慮下自己出番個類似嘅 App 呢？話晒 iPhone 或 iPod Touch 咁流行，好多遊港遊客都用佢㗎噃。有關當局不防考慮下。

要搵呢個 App，可以喺香港 App Store 以關鍵字「MTR Ride」作搜尋，或 click 呢度。

Y！路線：遊日必備

近排日圓升到阿媽都唔認得，想去日本玩嘅朋友真係要精打細算先至掂。尤其係交通，如果搭錯車又或者唔知點去撘多咗站，費時又失事。就等維京人今期介紹一款日本搭地下鐵必備嘅 iPhone 軟件：Y！路線。

只要你輪入出發及想到達嘅站名，然後按「探索」即可。佢會即刻列出有關的路線：幾時開車、邊個站轉車、幾多錢等等，一覽無遺。

日本人出名守時，比較少誤點的火車。如果你知道幾時出發，甚至可以於「現在時刻」注明你想出發或到達嘅時間。你甚至可以選擇是否需要搜尋「新幹線」，或「有料特急」及「高速巴士」等，令到 search 更有彈性及合乎需要。另外，如果你喺日本，仲可以以 AGPS 搵到你家下所在地最近嘅車站。



以下係小弟試過搜尋以新宿到上野嘅路線，一共搵到三條路線：



其實維京人寫呢篇 post，本身係想介紹「駅探」呢個 app 嘅，不過佢近排轉咗要俾錢，要成 350円，等有機會再介紹過。

「Y！路線」同埋「駅探」可以喺日本嘅 App store 度搵到。如果各位打開 iTunes Store 後，於主頁底部可以選擇國家「日本」即可到達。不過要下載，需先開番個日本 App Store 嘅 account　先至 OK。 遲下維京人會喺度教大家點樣開日本 App Store account，或可以先參考其他網友嘅辦法。

搵「Y！路線」可以進入日本 App Store 後以「Yahoo!路線情報」作關鍵字搜尋，或 click 呢度。如果搵「駅探」請click 呢度。

無聲的護城戰：Fieldrunners

Fieldrunners 呢個 game 目標就係要護城，唔好俾敵人入侵！玩下玩下，原來都幾令人沉迷，值得維京人喺度推介一下。

個 game 嘅玩法好簡單。敵人會於左手面開始攻城，而你嘅任務就係要擺設唔同嘅武器，以阻止敵人由左方進入己方（即畫面右手面）嘅地盤。

一開始先俾廿蚊雞你洗。你可以要嚟買 $5 嘅大炮、$10 嘅中程導彈或$20 嘅飛彈，將武器擺放於地圖任何一個位置，以阻止敵人入侵。價錢越貴，射程越遠。射死敵人就可以收錢。如果儲夠 $70，甚至可以買電擊遠程炮，要嚟對付敵人嘅直升機效果最好。





個 game 其實幾好玩，最唔掂嘅就係冇音效，玩得不是味兒。不過作者已預告將會有 version 1.1 同 1.2，寫呢篇 post 嘅時候完成進度分別為 80% 及 35%。到時候唔只有聲效，仲有新嘅 fieldrunner 同埋新嘅地圖。Upgrade 唔駛錢，睇嚟 $4.99 買一個好 game 絕對值得。

請留意，若新安裝或重裝，切記要 reboot 部 iPhone 先，咁樣先會達到最理想嘅效果。

想 download，可以喺 iTunes 以 keyword "fieldrunners" 作 search。或直接 click 呢度以打開 iTunes App Store。

用 iPhone 聽收音機

iPhone 就 iPhone 啦，本身都冇收音機功能，點聽 881903 或者港台，又或者新城財經台呀？咪玩啦！

如果大家有用過 Windows Mobile，都可能知道其實冇收音機功能嘅手機，都可以透過 GPRS 或者 Wifi 做到咁嘅效果。咁我哋至愛嘅 iPhone 又點會例外呢？

之前喺 iTunes Store 度以 $5.99 美金買咗個 Tuner Internet Radio 嘅 software，可以通過 WiFi 或者 3G / EDGE 去聽串流電台。呢個 app 都唔錯，preset 咗超過 500 個網上電台，突然間覺得自己博學咗好多，可以聽到好多世界唔同各地嘅音樂。而且呢個 app 仲可以自行輸入網上電台地址，支援 AAC+, MP3, PLS 同埋 M3U 格式。


原本仲諗住可以聽香港嘅電台，不過呢個 app 好似唔係咁 support mmx 同埋 asx 格式，所以都唔係咁做到維京人想要嘅收音機功能。

不過日前喺 iTunes Store 又有新發現，見到免費軟件嗰列排行榜多咗個叫 FStream 嘅軟件，睇佢介紹，全部係法文都唔係好知佢噏乜，大概係 support MP3, OGG, WMA 等等格式咁啩。好彩都係香港 D iPhone fans 做到嘢，喺 Customer Reviews 度列晒香港三間電台嘅網址出嚟。經維京人親自試過攞嚟聽歌聽馬聽財經都絕對冇問題。



發現有網友唔係好識用，其實好簡單，亦喺度講一講。先 click 去 Favorites 頁面，然後按下 Edit，於下面下方按下 Add new webradio　後會見到以下畫面：


Name 一欄內輪入你想聽電台嘅名，例如「商業電台第一台」或「CR1」或「My Radio 1」或一切你想要嘅名稱，最重要係 Address，輪入有關嘅網址。以下為香港三大電台嘅網址，喺 iTunes Store 亦有 post。

商業電台　雷霆 881: mms://mslive03.881903.com/cr1
商業電台　叱吒 903: mms://mslive03.881903.com/cr2
香港電台　第一台: mms://202.177.192.111/radio1
香港電台　第二台: mms://202.177.192.111/radio2
香港電台　第三台: mms://202.177.192.111/radio3
香港電台　第四台: mms://202.177.192.111/radio4
香港電台　第五台: mms://202.177.192.111/radio5
香港電台　普通話台: mms://202.177.192.111/ptc
新城　財經台：mms://s1.104mfonline.com.hk/Encoder5
新城　知訊台：mms://s1.104mfonline.com.hk/Encoder4
新城　AM 104.4：mms://s1.104mfonline.com.hk/Encoder3

Format 一欄輪入 mms，Bitrate (kbs) 小弟就輸入 192。

佢本身有個 option 叫做 Don't use cellular network 嘅，正路嚟講 Off 應該可以以 GPRS 或 3G 去聽收音機。不過唔知係咪 3 香港嘅關係，呢個功能好似唔係好 work。還望各位知道嘅朋友話聲俾我知。Thanks!

Tuner Internet Radio: 可以喺 iTunes Store 輸入關鍵字 "Tuner" 作 search，或 click 呢度。　

FStream: 可以喺 iTunes Store 輸入關鍵字 "FStream" 作 search，或 click 呢度。