送鼠迎牛，恭喜發財

恭喜發財！

維京人於假期期間外遊，要回來後才可以繼續介紹好 App 俾大家喇！喺度祝大家心想事成，iPhone 令你事業家庭愛情身體都可以得心應手啦！

Cheers!

好用但有點貴的 Todo

維京人呢排忙到抽筋，可能今年過年嚟得特別早啦，好似好多嘢都未做咁。喺呢 D 咁忙嘅日子，實在係好容易唔記得自己仲有咩未做嘅。呢個時候，iPhone 緊係幫到你啦。

今期要介紹嘅 App 就係 Todo 。

乜話？To do ? 喺 App Store 大把 to do list app 啦，駛鬼你介紹咩？咁又係。不過呢個係維京人第一個真金白銀買嘅 App，用咗咁耐仲成日都陪住我，唔可以唔介紹嘅。而且呢個可以話係咁多 to do list 入面比較貴嘅，各位如果正諗緊買咩 to do list app 好，亦可以俾大家參考吓嘛。

Todo 基本上一般 to do list 嘅功能佢都有，例如分類啦、設定日期啦、排 priority 啦等等。但佢最好嘅係可以設定唔同嘅工作清單，例如你有幾個 project 喺手，就可以設唔同 project 嘅 to do list。要一次過睇晒，亦得，揀 all 就可以了。



新版亦設咗 focus，你可以設定有關嘅選項，而決定乜嘢 task 係要 get focus 嘅。例如有 D 人過於咗 due date 都唔覺得係咩一回事嘅，咁佢可以設過期過咗一個禮拜先至 get focus 亦得。

就係當你完成一樣事項後，只要點一點，個 task 就會蓋章同埋移去 Completed 一欄處。而個 chop 印你亦可以自行設定唔同嘅同案。都幾過癮。



另外， Todo 亦可以同網上 to do list 作同步，包括 Toodledo 或者 RTM (Remember The Milk)。不過 RTM 要俾錢，所以小弟係用 Toodledo 嘅，都幾好用。

新創建 task 時，你亦可以設定 task 嘅種類，例如 Normal, Call a Contact, Email a Contact, Visit a Location 同埋 Visit a Website。例如 Call a Contact，你可以設定呢個 task 係要打咩電話嘅，咁只要下次點一點 task 名旁嘅電話圖案，即會變咗 phone mode，直接撥打出去，好方便！



如果係用 Mac 機嘅，咁仲方便，只要去到 www.appigo.com 下載 Appigo Sync，就可以同 iCal 同步。

你個 App 比起其他類似嘅 App，markup 個價就比較高，要成 $9.99 (美元)。如果想試用，可以先揀免費嘅 Lite 版試下。

如果想下載嘅朋友，可以 click 呢度。或以 Keyword "Todo" 作搜尋，不過應該搵到一大堆 to do list App。

用 iPhone 玩魚蝦蟹！

上個月維京人喺度介紹過 MotionX Dice 呢個 App。相信大部份讀者都有玩過，仲覺得好好玩㖭。不過大家可能會納悶點解呢個咁好嘅 App 冇魚蝦蟹呢個中國人（特別係南方人）傳統嘅賭博玩意㗎？咁樣過年好冇氣氛啫。

大家可以唔駛擔心喇。因為近期香港 App Store 佔據 Free App 排行榜第一位就係今期要介紹嘅魚蝦蟹喇。

呢個 App 又係免費嘅，值得支持本地創作。呢個 App 同 MotionX Dice 一樣，搖一搖三粒骰仔就會郁。如果唔鐘意搖，你仲可以按畫面左下角嘅「搖」，直至你按「停」為止。咁樣如果搭車或喺街度等朋友，手多多開個 App 出嚟玩亦唔需要俾人望住你隻手係咁 fing 係咁 fing 喇。





呢個 App 冇得換枱面背景，骰仔亦只得魚蝦蟹一種，而搖嘅時候亦冇震，玩感一定就冇 MotiveX Dice 咁盞鬼㗎喇。但農暦新年就到，有個魚蝦蟹坐陣 iPhone 度，拜年隨時都可以玩都唔錯噃。

如果想 download，可以以 keyword 「fish-prawn-crab dice」作搜尋。或者可以 click 呢度下載亦得。

補番句先：本 Blog 不鼓勵人賭博，但鼓勵本地 iPhone App 創作。



Universal Web Hosting

$6/month Free Setup


1000 MB web space

Unlimited email accounts

App Store 軟件突破 10000！

Apple 公司正式宣佈，通過 iTunes Store 嘅 App Store，已經有超過 10000個 App 供 iPhone 或 iPod Touch 用戶下載。

Apple 推出呢個買 software 嘅 business model，維京人推崇至上。一方面用戶可以有個正式渠道可以買一 D 肯定可以喺自己部機度行到嘅軟件；寫軟件嘅又有一個正常渠道去賣軟件，同埋肯定收到錢；而最大嘅贏家可能係 Apple，因為只有喺強大軟件嘅支持，iPhone 先至會越顯得佢嘅 powerful。越 powerful，其他手提電話用戶自自然然就會懂得選擇。

要開發 iPhone App，其實可能比你寫 Windows Mobile 或其他軟件簡單。不過你首要嘅就要有部 Mac 機，同埋要 join Apple 嘅 Developer Program。大家有興趣嘅可以 click 入呢度睇睇。Apple 對於 iPhone 軟件開發者有好強大嘅支援。有寫開 program 嘅朋友試寫 iPhone App，對 Apple 嘅 service 讚不絕口，話有唔識嘅地方只要問，一大段 coding 甚至會幫你寫埋咁濟。

你又有冇興趣寫下 App 呢？為香港軟件業出一份力嘛。

iPhone? 放屁！

iPhone 咁好用，做乜話佢放屁呀？有冇攪錯？

冇錯，iPhone 真係會放屁。講緊嘅係 iFart Mobile 呢個軟件。近呢兩個禮拜長據美國 App Store 銷售榜冠軍，竟然係呢個會放屁嘅軟件。真係估佢唔到。

呢個 App 價錢唔貴，只需 $0.99美金。呢個 App 喺 12月12日美國嗰便 release，頭兩個禮拜 download 次數已超過 113,865次，埋單計數呢個 App 嘅創作人已可以賺 78,908美金！你冇睇錯，維京人亦冇打錯，係 78908美金！兩個禮拜已經賺到首期可以買樓，絕對唔講得笑。

反而喺香港，好似反應就一般。可能呢排假期比較多，大家都未開 iTunes download 新嘢玩啩。

呢個 App 可以俾你選擇不同嘅屁聲，一按中間粒 "Fart Now" button 即可發出。有細屁聲大屁聲爛屎放屁聲咇出嚟嘅屁聲等，任你揀。



如果揀 "Sneak Attack"，仲可以 set 時間㖭：例如你可以設定 10 秒後自動發出自選屁聲。另外一個功能係 "Security Fart"，選擇後平放你部 iPhone 喺枱面，如果有人手多多郁你部機，即刻又會有放屁聲發出，問你敢唔敢掂人哋部機！？哈哈。



最抵死嘅係，你仲可以將你嘅自選屁聲 email 俾你嘅 friend。當你朋友收到 email 後，會有條 link，你朋友只需要 click 下條 link，就會有你 send 俾佢嘅屁聲出現。雖然係電腦發出，但感覺真係好似有人放屁咁，真係好鬼臭。

如果你自問你嘅屁聲好聽過或者大聲過呢個 App 發出嘅放屁聲，呢個 App 仲有錄音功能，錄完後只需要揀 "Record-a-fart" 就可以播番出嚟！

如果有興趣，可以以關鍵字 "iFart Mobile" ，應該會搜尋到有幾款類似嘅軟件。記得唔好揀錯，個全名係 "iFart Mobile - Fart Machine for all ages"。或者直接 click 呢度下載都得。

用 iPhone 作 mind-mapping

一年伊始，萬象更新。係時候諗下今年有乜大計先。

工欲善其事，必先利其器。要諗計，緊係要搵 D 啱用嘅 iPhone 軟件幫幫手啦。唔知道大家有冇聽過 mind-mapping 呢？所謂 mind-mapping，即係話你先有一個諗法或關鍵字，然後將圍繞呢個 central idea 將一 D 諗法、字詞、要做嘅 task 等放晒落一個圖裡面。

以下係一個例子。基本上圍繞中心 idea 可以延伸開去，然後每個 idea 再延伸多幾個 idea。基本上一幅 mind map 就好似一個太陽咁，有中心，然後再伸展出去。



淨係喺香港嘅 App Store，如果以 "mindmapping" 作 keyword 去搜尋，就可以搵到幾款 App。維京人今次介紹嘅就係 iBlueSky (mindmapping)，貪佢簡簡單單，唔需要太複雜，夠用就好。

一打開個 App，你就可以選擇創建新嘅 Project。每一個 Project 即係一個 mind map。先輪入你要嘅中心 idea，圍繞住呢個 idea 就可以加 branch。當你加晒咁多個 branch 後，若發現需要再 organize，只需要把你想搬位嘅 branch 按下 "cut branch"，然後 paste 番落去你想 attach 落去嘅 branch 即可。　





當完成後，你就可以 email 去你想要嘅 account 度。佢會有四個 format，包括 PNG (圖像格式)、PDF、OPML 同埋 MM。其中 OPML 及 MM 格式可以於電腦上面以其他嘅 mind-mapping software 打開作 edit。

好似好複雜？唔緊要，原來出呢個 App 嘅公司都拍咗段片嚟介紹，大家可以睇睇：



呢個 App 亦有部份需要改善嘅地方，例如 email，佢只會揀 contact 裡面有嘅先可以。如果你想 email 去一個新電郵地址度，要先要喺 contact 裡面加入有關嘅 email。

各位有興趣嘅朋友，可以以關鍵字 "ibluesky" 作搜尋，或 click 呢度都得。呢個 App 要 7.99美元。

2008 iTunes App

寫呢篇 post 嘅係 2009年１月１日，喺度祝各位新年快樂，嚟緊嘅一年有好多 iPhone 好 App 可以 download！

2008年俾人嘅感覺係世界都特別多事情發生，包括雪災呀、地震呀、奧運呀、金融海嘯、玉女結婚呀等等等等。咁多件特別嘅事入面，最令人興奮嘅就緊係 Apple 推出 iPhone 3G 啦。因為 iPhone 3G，Apple 推出新版本嘅 App Store，等大家可以上網 download 各式各樣嘅 iPhone App 同 iPhone game。推出唔夠半年，已經做出唔錯嘅成績。Even 喺香港，都好多人會肯俾錢買軟件，呢個亦可以話係軟件下載嘅突破。

Apple 喺 iTunes 嘅 App Store，較早前亦刊登咗 2008 Top 10 Paid App 同 Free App。大家又睇睇喺香港嘅 App Store 最好賣嘅係乜東東？



喺 App Store 最好賣嘅始終都係 game 及娛樂方面嘅 App。難怪各大 software house 都以此為 target。喺香港嘅 Store 只係登咗香港 Store 最多人 download 嘅 overall 頭十大。但係去到某部份國家嘅 2008 Top Apps，例如美國同埋英國等等，就會多一 D 嘢睇。分別列出 Top Overall, Top Games, Top Entertainment, Top Utilities, Top Social Networking 同埋 Top Music。

不如我哋又睇下其他國家嘅 Top Overall 係乜？

美國：


英國：


日本：


日本嘅 Top App 比較多元化，有 music，有 productivity, 亦有 reference。可見日本人用 iPhone 唔係淨係要嚟打機，而係集多功能於一身嘅一把萬用刀。咦？睇番維京人，原來好多時候介紹嘅亦都係以 game 具多喎。睇嚟係時候喺新一年發奮下先得，亦喺度要介紹多一 D 其他實用嘅軟件俾大家。話晒 iPhone 唔只係一部變種嘅 NDS 或者係 PSP 嘛。

要 access 以上嘅 2008 Top Apps，大家可以 click 呢度。要留意嘅係如果你最後使用 iTunes 時嘅 App Store 唔係香港，佢會 transfer 你去返上次 browse 有關國家嘅 2008 Top Apps。

各位如果想睇吓其他國家嘅 2008 Top Apps，則可以於香港嘅 iTunes 主頁（即係 App Store 主頁) 下方先選好國家，再 click 呢度都得。

香港 iTunes Store 只有 App Store，唔似得某部份國家嘅 iTunes Store 咁有歌有 movie 可 download。大家亦可以睇吓其他國家嘅其他 download。部份 Music Store 如日本，仲會將音樂分類，例如 R&B, J0-Pop 等，大家都可以各取所需。

再一次祝大家有個愉快嘅 2009！Happy New Year！

Cheers！

睇戲，enjoy！

假期氣氛，繼續濃厚。放假其中一個最好嘅節目當然就莫過於去睇戲啦。不過有時出到街都唔知近排有咩戲，又或者唔知邊間戲院有自己想睇嘅戲，呢個時候，iPhone 又大派用場喇！

相信好多朋友都有 download 過 Enjoy 呢個 App。雖然係咁，估計亦有好多對 iPhone 比較新嘅朋友想知道點用。就等維京人喺度介紹下啦。

簡單 D 講，呢個 App 就係提供喺香港上映中嘅電影資訊，等你喺繁忙嘅生活中都可以揀到一部好戲。功能都唔錯㗎，會顯示上映中及就嚟上映嘅電影介紹，另外最重要係有介紹有關電影包括今日在內三日嘅場次，即係話喺邊間戲院幾點做都有顯示。佢仲有分香港九龍新界俾你做 filter，好方便！



如呢個 App 喺 App Store 所講，暫時仲有少量問題未解決，例如一日裡面公映場數太多時，字體會變小等。不過都唔係太影響呢個 app 嘅實用性。



呢個 App 係由創作 Hong Kong Weather 嘅作者 Jeffery Wong 所創建。Hong Kong Weather 相信各位都用過，而且都覺得好用。呢個 App 亦一樣係免費嘅，大家亦不能錯過。有興趣嘅朋友可以喺 Hong Kong App Store 輪入 "Enjoy" 作搜尋，或 click 呢度都得。

MotionX Dice：假期玩樂必備

喺呢 D 普天同慶嘅日子，少不免都有機會同 D 朋友落下 bar，又或者喺屋企開局玩下類似大話骰嘅 game 啦。呢個時候 iPhone 原來都有計。如果喺 App Store 度 search "Dice"，大家會發現原來有好多骰仔嘅 App。

喺咁多個骰仔 game 入面，維京人當然就未試晒啦，不過就喺度推介呢個評價都唔錯嘅 MotionX Dice。

只要一打開個 App，可以先進入設定選定你要嘅選項。你可以選擇唔同款色同埋數目嘅骰仔。款色超過 50款，有 D 款仲好頂癮，例如應節嘅聖誕老人或者 Buy/Hold/Sell 等。數目則由 1粒到 6粒都得，最緊要自己鐘意。另外，枱布背景亦可以設定。



揀好骰仔同枱布背景後，只要搖一搖就可以擲骰。擲嘅時候最過癮，有聲之餘部機仲會震，非常好玩。你仲可以將擲好咗嘅骰仔放於畫面上方嘅，咁下次擲骰就唔會擲到佢。





呢個咁好玩嘅 App 係免費嘅，各位不防 download 落嚟玩玩。有興趣嘅朋友可以喺 App Store 以 "MotionX Dice" 作搜尋，又或者 click 呢度都得。

喺度祝大家有個愉快嘅假期！

單手操控 Safari

當各位搭車排隊或等人，唔知會唔會攞部 iPhone 出嚟玩呢？要利用呢 D 唧出嚟嘅時間，用 iPhone 上網絕對係一個好嘅選擇。

唔駛講，打開 iPhone 嘅專用 browser Safari 先。唔 ...... 呢段新聞好似幾得意喎 ...... 咦？呢篇 blog post 都好過癮啫 ...... 正想用兩隻手指將個網頁放大，睇清楚內文嘅時候，「唉吔！幣傢伙！」！

如果閣下正搭緊車，企喺車箱內一隻手已經揸住個扶手；或者喺厠所門口等女朋友出嚟，而一隻手已經攞住佢嘅手袋同埋 shopping 嘅大出血戰跡；又或者其中一隻手整親，打緊石膏，你就有可能感受到以上「幣傢伙」嘅情況。

唔駛驚，Apple 嘅 iPhone 係好貼心嘅。原來閣下只要用輕輕咁 double click 你想放大嘅內容，Safari 就會自自然然 focus 喺有關嘅 frame 度，然後放大。睇下以下嘅效果如何？

　　

如果又想縮番細，再次 double click 即可。真係好方便！