維京人又再浦頭鳥～

原來唔經唔覺，已經有成三年幾冇 update 過呢個 blog。原因其實好簡單，「三個字」：懶到出汁！ 其實都唔係咁懶嘅，只不過維京人近呢三年幾公司不停有嘢做，個個月都要出 trip，所以咪冇抽時間寫吓 blog 咁囉。 講開又講，喺呢幾年入面，mobile 嘅世界真係日新月異。2011年出咗 iPad 之後大家就更加機不離手。咁當然維京人都唔例外啦，基本上冇咗 iPhone 同 iPad 係完全生存唔到㖭。 最奇怪嘅係：有咁多身邊嘅人擁有一個或者多過一個嘅 device, 原來好多人都係攞嚟睇下網頁，打下機咁啫。甚至近日有朋友問我點樣喺 iOS 關閉開多咗嘅 app!(!?) 攪到維京人好想將有限嘅用 app 經驗 share 吓俾大家。 That's why 又 pick up 番寫 blog 嘅諗法。大家得閒上嚟望望啦。

喺 iPhone 自制 Ringtone

有朋友問點樣可以整  iPhone 嘅 Ringtone。如果喺 Internet 搵一搵，好多 Tools 或者方法其實都大同小異，就係首先將段音樂整成 m4r 格式即可。

喺度維京人就冇乜興趣教你用其他 PC / Mac 機嘅軟件整 m4r ，反而留意到喺 App Store 度有好多聲稱可以整 Ringtone 嘅 App。有朋友見到都好有興趣，但一般睇 App 嘅 comment 後都覺得好似好複雜咁，唔太敢恭維。維京人一於管住大航海嘅精神試下 download 嚟玩下。

喺排行榜較高位置嘅有 Ringtone Designer 同埋 RingtoneMaker，兩個都有 Free 版，不防 download 嚟玩下。Pro 版要收錢，但 Ringtone 長度較 Free 版嘅 20秒多咗 10秒。

呢兩個 App 用法好簡單，只要安裝後跟指示做。各位可以喺 iPod 度選擇心儀嘅歌即可。問題係好多朋友㩒完 "Save" 或 "Create" 後，都唔知隻 Ringtone 放咗喺邊度。

呢個時候，先將部 iPhone plug 落去電腦嘅 iTunes 度先 。冇錯，用 App 整 Ringtone 有個“缺陷”，就係都係要返去電腦先可以做。喺電腦嘅 iTunes 裡面，搵到自己部機，選擇頁面 "Apps"，即係平時可以揀啲咩 App 裝喺自己部機嗰個頁面。拉低少少，會搵到 "File Sharing" 嗰部份。

然後你就會搵番 Ringtone App 嘅 Files。選擇有關嘅 file，save to 喺自己部電腦度先。咁樣你就已經完成整 m4r 嘅步驟。

最後埋門一腳，返番去你部電腦，點擊啱啱  save 完嘅 file，佢就會自動出現喺 iTunes 嘅 Ringtone Library，選擇 Sync 機即可將 m4r sync 去你部 iPhone 度吖。攪掂！

睇就好似好複雜。但整咗一次之後就會發覺其實呢個方法都唔係太難。有興趣嘅朋友可以試吓吖。

用 iPad 睇雜誌，又平又方便！

好多朋友都覺得 iPad 咁大個畫面，攞嚟睇電子書就最正㗎喇。呢點維京人係絕對認同嘅。所以一早已經裝咗 iBook 同埋 Kindle，睇個不亦樂乎。而 App Store 又有大把 整到成個 App 嘅書，真係好正。

至於睇報紙，香港嘅就已經有 頭條日報、AM730、SCMP、The Standard 等，又係冇得頂。

咁雜誌又點呢？一樣有! 其中 Wired 前兩個月已經出咗 App 版，完完全全利用咗 iPad 嘅功能。除咗雜誌內可以 flip 嚟 flip 去睇唔同嘅 topic，做得比較好嘅係好似上咗 web site 咁，某啲頁面仲可以有動畫同埋 Video 睇。將 iPad 嘅特性好處發揮得淋漓盡致。

淨係睇 Wired，可能有 D 齌，維京人今期推介一個超好嘅 Magazine Reader 入大家，佢就係 Zinio 喇。不過好遺憾地呢個 App 淨係可以响美國嘅 App Store download, 暫時仲未登錄香港 App Store。

呢個 Zinio 點解值得推介？就係因為大部份嘅外國雜誌，都可以  through Zinio 呢個網站買到。維京人就訂咗  MacWorld, PCWorld, Maxim 同埋台灣嘅天下雜誌。

乜話？台灣雜誌都有？冇錯，甚至連內地部份雜誌都有㖭呀。

雖然呢個 App 喺美國嘅 App Store 睇到，但係免費嘅。至於買雜誌，則可以 through 佢個 web site。大部份都平到冇人有，例如 MacWord, US$19.97就有 12 期，比起買 physical 嘅一本雜誌，平成 75% 有多！

Zinio 除咗有 iPhone / iPad 版外，亦有 PC 同理 Mac 版。無論有冇 iPhone / iPad，訂雜誌同睇雜誌都好方便吖。

如果想 download，可以 click 呢度吖。

另外呢個 App 一個唔係咁令人滿足嘅地方係日本嘅雜誌特別少。不過呢個小弟都有其他 App 可以推介。得閒就 post 下俾大家。

Cheers!

Portrait Lock

有朋友問維京人點解 iPhone 右上角响 Battery 隔離會多咗把鎖嘅公仔。（請參看下圖）

實情其實好簡單，呢個係 iOS 4 嘅 feature 嚟嘅。當我哋 double click  home button 顯示 multi-tasking bar 嘅時候，掃去左手面最左邊粒 button, 就會出現把鎖嘅物體。呢個係表示 Portrait Lock，一按即會响畫面右上角出現呢個 icon。亦即係話當你打橫部機，本來會打橫嘅 App (例如 Safari, email 等）都係唔會打橫嘅。

呢個 function 最啱搭車嘅時候用，人多擠迫部機震嚟震去都唔驁畫面又打直又打橫咁煩。

同樣 iPad 亦有呢個 function。 不過唔係軟件層面而係硬件層面處理。只要睇下部機右手面最上嗰粒 physical button 就係喇。

你話 Apple 嘅 design 係咪真係好貼心呢。

Perfect match: iPad + Apple Wireless Keyboard

自從出咗 iPad 後，維京人真係愛不釋手。日日喺屋企都攬住佢嚟上網、check email、睇 ebook、上 Facebook，真係好多時連電腦都唔開都做到晒要做嘅嘢。

只不過，當返到公司，好多時都要處理文件，唔用電腦又好似幾影響生產力。就算 iPad 嘅 app 點 fancy 點多功能都好，最唔爽嘅都係要大量打字時。要知道，雖然 iPad 嘅內置 touch screen Keyboard 其實都唔錯，但係如果要輸入一 D 好長嘅一段文字，其實都要用手指督下督下。

我又唔係老細，回覆 email 如果淨係答  OK 或者唔 OK 就話啫，但實際上又真係唔得。就係咁，維京人成日都想搵 D 好打字嘅 iPad solution。

喺 Apple Store 度搵下搵下，搵到專為 iPad 而設嘅 iPad Keyboard Dock，可以將部 iPad 插落個 dock 度，即可以 keyboard 輸入文字。Apple Store 買嘢有個好處，就係好多用家都會俾對產品嘅一些評語，可以睇過先決定買定唔買。

噢，原來呢個 iPad Keyboard Dock 都唔係咁好㗎咋噃，浄係可以打直放部 iPad！嘩！唔掂喎，小弟多數都打橫部機嚟用，打直先打到字唔係好接受到囉。

結果呢，維京人就選咗 Apple Wireless Keyboard。呢個 Keyboard 係用 bluetooth 嚟連接 iPad 嘅。除咗 iPad，iMac 甚至 iPhone 都用到，咁樣好似好抵咁喎。除咗打字外，喺 iPad 度選擇語言只要按 Ctrl - Space，而大細聲光暗度等嘅 function key 都 OK，好開心呀！呢個真係一個 perfect 嘅 solution！

大家有興趣嘅話，可以諗諗佢！如果有更好嘅 solution，不防喺度留個言吖。Cheers!

有 iPad，有 productivity！

久違了嘅維京人呢幾個月簡直顛咗。為乜？之唔係為咗玩 iPad 同埋玩 iPhone 4 囉。

既然玩得咁開心，都係時候要喺度 share 番下玩咗 D 乜嘢先。為咗隆重其事，小弟特登改咗呢個  Blog 嘅版面，甚至連 title 都改埋 +iPad 全新版。諗起都覺得小弟好有誠意，呵呵。

維京人係四月初一出嘅時候買 iPad 嘅，淨係買 App 都駛咗唔少錢同埋時間。喺度分享一下，希望可以幫到大家。

1. GoodReader
唔駛多講，見佢長期高據 Top Charts 頭一兩位嘅位置就知道。呢個 reader 除咗可以讀取你嘅 email、FTP、MobileMe、DropBox、Box.Net 等等嘅文件外，仲可以幫你儲喺部 iPad 度，等你得閒可以睇。家下我當咗佢係 Mac 機嘅 Finder 或者 MS 嘅 Windows Explorer 一樣。

2. DropBox
家下興玩 Cloud Computing 同埋 Cloud Storage。當你有個 file 想喺部電腦度傳俾部 iPad，有乜計？DropBox 可以幫到你。類似嘅 App 有 iDisk（即 MobileMe)、Box.Net、SugarSync 等。DropBox 勝在可以裝個 Software 落你部電腦度，Drag and Drop 非常 easy。如果 SugarSync 有 Search 功能嘅話我會揀 SugarSync。

3. PCalc Lite
如果連計數機都冇部，點樣提高生產力？

4. Documents To Go Premium
唔想俾錢買 Page 或者 Numbers，但又要有 Word 同埋 Excel 嘅 function，咁點算？ DocToGo 係你嘅選擇。Excel 加咗 password 等 feature 都有，同響 PC 度用相差無幾。 Premium version 仲可以修改 PowerPoint file 同埋 access DropBox、 Box.Net 等，連 GoodReader 都可以慳番！（咁當然，GoodReader 仲可以打開 Zip file 等，USD 0.99 都係必買嘅）另一選擇係 QuickOffice，如果用過嘅朋友不防俾下意見邊隻好  D。

5. Keynote
咩話？又話 DocsToGo Premium 可以改 PPT 文件？係就係，不過如果你真係想用 iPad 做 presentation，建議都係整個 Keynote 幫幫你好 D。

6. 1Password Pro
日理萬機嘅朋友應該會有萬千嘅 User ID 同埋 password 要記嘅。App Store  裡面有好多記 password 嘅 Software，其中 1Password 近期嘅 version 仲可以將 core file 放喺 DropBox 度，咁就無論用 iPhone 定 iPad 都可以  synchronized 啦！

7. Evernote
個人鐘意嘅 notes app 係 Awesome Note，但係等咗成幾個月都未出 iPad version，唯有用番 Evernote。D 筆記放喺舊雲度，無論喺 PC、Mac、iPhone 等 update 咗都可以喺 iPad 度睇得番。又一個 Cloud 嘅實際應用。

8. Speak it!
實情 iPhone 版可能更方便。輪入英文然後讀出嚟，同鬼佬開會前即刻補補佢。

9. To Do List
So far 用緊 Things / OmniFocus，但係仍然鐘情 iPhone 版嘅 Awesome note。OmniFocus 好貴（USD 39.9 !!!），而且介面嘅設計同 iPhone 又有少少唔同，成日都唔知佢係咪同步。OmniFocus 比 Things 有個好處，就係可以將資料放喺 MobileMe，又係 Cloud Storage 例子。

10. LogMeIn
Remote Access 嘅軟件 App Store 有一大堆。試過 LogMeIn so far 都好滿意，都冇試其他。

iPad 維京人

差唔多冇寫呢個 Blog 有成一年有多。最主要嘅原因係眼見 App Store 嘅 App 又越出越多，而又越嚟越多 App 係值得介紹，以小弟一己之力，根本冇可能喺度同大家分享。反而各 iPhone User 對 App Store 嘅操作越嚟越厲害，自己搵 App 都唔係咩難事。所以就有也點寫咯。

Anyway, 維京人喺四月第二個禮拜買咗部 iPad。由於唔係好多人有用過，同埋好多人都想知道好唔好用，值唔值得買等等，會陸陸續續 post 一 D 使用心得俾大家知。快 D bookmark 咗呢個 blog 先啦。

Cheers!

iPhone Software 3.0，你 update 咗未？

相信好多朋友尋晚都冇咁早瞓。點解？之唔係要 upgrade iPhone Software 3.0 囉。維京人當然亦第一時間下載。有關嘅功能，可以 click 呢度。有時間會喺度同大家分享使用心得。

The Sims 3：登陸 iPhone！

喜歡玩模擬市民 (The Sims) 嘅朋友，呢個禮拜相信都相當興奮。因為 The Sims 3 已經喺啱啱過咗嘅禮拜 release 咗。同時間，iPhone version 亦空降 Apple App Store。$9.99 美金，幾日間已躍上排行榜第一位。

維京人亦第一時間 download 咗，試玩咗幾日，家下介紹下先。

一開始遊戲，例牌地要先設置有關人物嘅外形。PC / Mac version 嘅人物造型多到可以攪半日，但 iPhone version 基本上選擇有限。甚至只有一款樣貌供選擇，你只可以改眼睛瞳孔同埋 Sim 嘅膚色，比相像中嘅少。



呢個 game 亦好似 The Sims 3 PC / Mac version 一樣，可以選擇 Sim 嘅性格，包括神經質、有趣、怕醜、沉悶等等。亦設有 73 種大大小小嘅目標，俾個 Sim 去做而令到個 Sim 開心。



玩咗幾日，維京人嘅 Sim 已經賺夠 1000蚊擴大咗間屋，同埋結埋婚㖭。都係搭車等人嘅時間玩，呢個 game 真係 kill time 好幫手呢。不過小弟亦玩過幾年前 Nokia n-gage 嘅版本同埋 PSP 版本，都係覺得嗰兩個版本好玩 D，可能係因為有半故事模式，同埋可以落吧等 detail 細節。

亦有玩過嘅朋友話呢個 iPhone 版本玩下玩下會跳咗出嚟。維京人亦試過有呢個情況。建議每次裝咗新 App 或者同電腦 Sync 後，reboot 一下部 iPhone。

想下載嘅朋友，可以喺 App Store 以關鍵字 "The Sims 3" 作搜尋，或 click 呢度都得。

FX360 - 睇晒外匯、黃金、石油報價

美元暴跌，有留意開維京人個 blog 嘅朋友，都知道小弟近排入咗唔少黃金同埋白銀合約。有 D 時候出到街，心思思都想 check 下價㗎。呢個時候，iPhone 又再一次發揮佢嘅小宇宙。

喺 Apple App Store 內，有關嘅軟件都唔少。今次介紹嘅係一個免費嘅軟件，叫做 FX360。



佢除咗有報價外，亦有圖可以睇，要知道睇圖係專業炒家必備嘅工具。圖表係即市圖，如果要睇日線圖周線圖等呢個 App 就冇計。除咗圖表外，亦有 calendar。想知道有乜財經數據公布，呢個 App 亦可以睇到。



另一樣特別嘅係，呢個 App 仲有 technical analysis 同埋 commentary，係 App Store 咁多隻 Quote 價 App 入面少見嘅。咁當然，準唔準就見仁見至。



總括嚟講，呢個 App 有佢嘅賣點。就算你唔短炒外匯或者黃金石油，亦可以利用呢個 App 嘅 Calendar 同埋分析，去幫助自己對呢個 market 更了解。如果係炒家，有咗佢亦會多把萬用刀喺身。

想下載，可以 click 呢度，或者喺 App Store 度以 keyword "FX360" search 一下。