網頁

2008年12月28日星期日

睇戲,enjoy!

假期氣氛,繼續濃厚。放假其中一個最好嘅節目當然就莫過於去睇戲啦。不過有時出到街都唔知近排有咩戲,又或者唔知邊間戲院有自己想睇嘅戲,呢個時候,iPhone 又大派用場喇!

相信好多朋友都有 download 過 Enjoy 呢個 App。雖然係咁,估計亦有好多對 iPhone 比較新嘅朋友想知道點用。就等維京人喺度介紹下啦。

簡單 D 講,呢個 App 就係提供喺香港上映中嘅電影資訊,等你喺繁忙嘅生活中都可以揀到一部好戲。功能都唔錯㗎,會顯示上映中及就嚟上映嘅電影介紹,另外最重要係有介紹有關電影包括今日在內三日嘅場次,即係話喺邊間戲院幾點做都有顯示。佢仲有分香港九龍新界俾你做 filter,好方便!



如呢個 App 喺 App Store 所講,暫時仲有少量問題未解決,例如一日裡面公映場數太多時,字體會變小等。不過都唔係太影響呢個 app 嘅實用性。



呢個 App 係由創作 Hong Kong Weather 嘅作者 Jeffery Wong 所創建。Hong Kong Weather 相信各位都用過,而且都覺得好用。呢個 App 亦一樣係免費嘅,大家亦不能錯過。有興趣嘅朋友可以喺 Hong Kong App Store 輪入 "Enjoy" 作搜尋,或 click 呢度都得。

2008年12月25日星期四

MotionX Dice:假期玩樂必備

喺呢 D 普天同慶嘅日子,少不免都有機會同 D 朋友落下 bar,又或者喺屋企開局玩下類似大話骰嘅 game 啦。呢個時候 iPhone 原來都有計。如果喺 App Store 度 search "Dice",大家會發現原來有好多骰仔嘅 App。

喺咁多個骰仔 game 入面,維京人當然就未試晒啦,不過就喺度推介呢個評價都唔錯嘅 MotionX Dice。

只要一打開個 App,可以先進入設定選定你要嘅選項。你可以選擇唔同款色同埋數目嘅骰仔。款色超過 50款,有 D 款仲好頂癮,例如應節嘅聖誕老人或者 Buy/Hold/Sell 等。數目則由 1粒到 6粒都得,最緊要自己鐘意。另外,枱布背景亦可以設定。



揀好骰仔同枱布背景後,只要搖一搖就可以擲骰。擲嘅時候最過癮,有聲之餘部機仲會震,非常好玩。你仲可以將擲好咗嘅骰仔放於畫面上方嘅,咁下次擲骰就唔會擲到佢。





呢個咁好玩嘅 App 係免費嘅,各位不防 download 落嚟玩玩。有興趣嘅朋友可以喺 App Store 以 "MotionX Dice" 作搜尋,又或者 click 呢度都得。

喺度祝大家有個愉快嘅假期!

2008年12月22日星期一

單手操控 Safari

當各位搭車排隊或等人,唔知會唔會攞部 iPhone 出嚟玩呢?要利用呢 D 唧出嚟嘅時間,用 iPhone 上網絕對係一個好嘅選擇。

唔駛講,打開 iPhone 嘅專用 browser Safari 先。唔 ...... 呢段新聞好似幾得意喎 ...... 咦?呢篇 blog post 都好過癮啫 ...... 正想用兩隻手指將個網頁放大,睇清楚內文嘅時候,「唉吔!幣傢伙!」!

如果閣下正搭緊車,企喺車箱內一隻手已經揸住個扶手;或者喺厠所門口等女朋友出嚟,而一隻手已經攞住佢嘅手袋同埋 shopping 嘅大出血戰跡;又或者其中一隻手整親,打緊石膏,你就有可能感受到以上「幣傢伙」嘅情況。

唔駛驚,Apple 嘅 iPhone 係好貼心嘅。原來閣下只要用輕輕咁 double click 你想放大嘅內容,Safari 就會自自然然 focus 喺有關嘅 frame 度,然後放大。睇下以下嘅效果如何?

  

如果又想縮番細,再次 double click 即可。真係好方便!

2008年12月18日星期四

iPhone 上的模擬成市 (Simcity)

維京人望穿秋水嘅 Simcity (模擬城市) iPhone 版已經出咗喇。如果有睇開呢個 blog,都知道小弟係非常非常鐘意玩呢個 game 嘅,家下出埋 iPhone 版,緊係第一時間 download 落嚟玩吓先啦。

一 click 呢個 game 先要選擇新 game 定係 load 舊 game。選擇後個屏幕白色一遍,等我仲以為個 game load 唔到。不過始終呢個係大 program 而唔係濕碎 game,所以都可以接受。

個 game 基本上同喺電腦上面玩分別唔大。玩家一樣可以起住宅區、商業區同埋工業區,可以起差館起學校起飛機場。你可能會諗,用手指 drag 嚟 drag 去,容乜易擺錯位㗎?Electronic Art 嘅出品又點會咁唔貼心?佢一早就幫你諗好喇。每次 drag 預想建築嘅地區,你要再 click 一 click 去確認,咁就唔會驚放錯位啦!







另外,如果想睇 map,一樣得。Map 可以分地面同地底,又可以以不同嘅選項如空氣污染、居民滿意度指數、消防指數等。除咗 map,仲可以睇 graph 以了解有關指數的走勢,以了解城市有邊方面可以改善。

喺電腦上面玩嘅 Simcity,好多時玩到咁上下就會俾 D Advisor 嘈,又話要起多 D 學校、或醫院個 budget 要增加、又或者叫你整頓吓 D 交通等等。估唔到咁細部 iPhone 都有呢 D 功能。

唔好以為 iPhone 版可以豁免冇災難,喺模擬城市,災難嘅發生永遠都係考驗市長嘅危機意識。呢個版本嘅 Simcity 有 UFO、火災、龍捲風、地震、同埋毒雲。



若你覺得個畫面太細睇唔清 D 樓,當然可以用 iPhone 獨有嘅 finger zoom in zoom out 去睇啦。論畫面,真係好正!

有咗呢個 game,睇嚟以後出街都好唔得閒。另外亦要擔心用電量嘅問題。好在維京人買 iPhone 後已第一時間買定舊後備電,方便用到差唔多冇電時,可以插落部機底部繼續使用。

呢個超級正 game 賣 $9.99 美元。想買嘅朋友,可以喺 App Store 以關鍵字 "Simcity" 作搜尋,又或者直接 click 呢度。就當送份好嘅聖誕禮物俾自己啦。

2008年12月14日星期日

Reading:閱讀香港雅虎新聞

繼續介紹本地制作嘅 iPhone App。

今期介紹嘅呢個 App 叫作 Reading,據佢嘅 description 所講,亦叫作「閱讀港民」。呢個 App 係免費嘅,相信已經有好多網友亦 download 過。Reading 係一個簡單嘅新聞頻道閱讀器,新聞全部都係嚟自 Yahoo!香港。訂閱嘅內容包括港聞、國際兩岸、財經、副刊甚至係體育娛樂等。

一 click 入呢個 App 就會顯示各新聞標題,各位亦可以自行點選想睇嘅新聞分類。至於揀想睇嘅新聞點擊入去就得。睇過嘅新聞喺標題處會以 highlighted 顯示,非常貼心。



Reading 亦提供文字模式或網頁模式選項。如果係文字模式,只會顯示新聞嘅文字內容。否則,就會顯示雅虎新聞嘅有關網頁。



如果有興趣嘅朋友,可以以 Reading 作關鍵字作搜尋,或者 click 呢度。呢個 App 嘅作者 Sean Ho 另一個作品就係前幾次維京人喺度介紹嘅 GoHan。兩個 App 都係免費,真係好有誠意寫好 App。

2008年12月10日星期三

iPhone 上玩大富翁

正當維京人靜待十二月中 Electronic Arts 推出 SimCity iPhone 版,點知失驚無神原來新鮮滾熱辣出咗隻大富翁 iPhone 版。維京人當然第一時間 download 嚟試下玩啦。

首先個 game 要你揀 game mode 先。原來呢個 game 可以以 wifi 作對打,最多 4 個 player 連線。呵呵 ... 同朋友去旅行想 kill time,又多一個好方法 ....... 不過原來佢要各個同樣嘅 LAN 先至玩得。呢個 function 有待測試。

咁當然,你亦可以選擇 iPhone system 做你嘅對手嘅。



進入遊戲前,你可以選擇咩形嘅環境同咩 table 去玩大富翁。連咁都有得揀真係估佢唔到。選擇好後就進入遊戲喇。每個 player 都以大富翁嘅經典棋子作表示,例如係車仔或者風車仔。到你擲骰仔時,就搖一搖部 iPhone 就可以擲骰,過癮。

   



玩法基本上同平時玩嘅大富翁冇乜分別,玩嘅時候可以 full board 又可以 zoom in 去睇地圖。佢仲可以改 game rule,例如通過 start 可以攞二百萬定係四百萬,又或者可以 set 到銀行唔俾錢亦得。



呢個 game 可以一路聽住歌一路玩,好體貼。而且仲可以 save 㖭,絕對唔駛擔心出咗個 program 就冇得再玩啦。

唔講咁多喇,自己上 App Store 睇啦。你可以以關鍵字 Monopoly 作搜尋,又或者 click 呢度都得。

玩得開心 D 啦。

2008年12月8日星期一

邊走邊學:iTunes U

市道唔好,大家都想搵 D 嘢幫自己增吓值,以提升競爭力。不過如果有份正職返緊工嘅朋友,日頭鬼咁多嘢做,放咗工都已經筋疲力盡,死吓死吓咁,如果仲要定時定刻去上堂,都未話唔辛苦!

其實大家有冇諗過,利用下等人或者搭車嘅時間學吓嘢咁呢?

你可能會話:唓,我夠知啦, download 定 D 錄音喺部 iPhone 或者 iPod 度,咁咪隨時可以聽囉!

如果你咁諗,實在太浪費 Apple 俾你嘅資源。

相信各位擁有 iPhone 或 iPod 嘅朋友,或多或少都試過用 iTunes 去轉歌,download App,下載 PodCast 等。其實除咗呢 D 工具同埋資源外,通過 iTunes,我哋亦都搵到好多學習嘅資源。小弟想講嘅就係 iTunes U。



iTunes U 可以喺 iTunes Store 度搵到。喺 iTunes U,你會搵到講義、語文課、錄音書、以及 PodCast (錄音或影像)等等,應有盡有。無論你係中學生大學生定係社會大學嘅學生,你要搵嘅 Subject 基本上都可以搵到,而且免費。內容仲係有知名大學提供,包括 Yale 同埋 Stanford 等,超過 75,000 個 audio 同埋 video file 俾你 download,真係學海無涯。

有 D course 係一次過嘅,你只要 download 錄音或影像。有 D ongoing 做緊嘅 course,你亦可以好似 PodCast 咁 subscribe,然後 iTunes 會自幫你創建一個新嘅 playlist,只要你 sync 部 iPhone 或 iPod,就可以隨時隨哋隨心所欲咁學習喇!

近期有嘅 course 係 Spanish,各位如果有興趣可以去睇下。

iTunes U 可以喺 iTunes Store 度搵到。香港版本由於只有 App Store,所以係冇 iTunes Store 嘅。你可以去美國或日本等國家嘅 iTunes Store,左手面就有 iTunes U 呢個分類。或者直接 click 呢度都得。

2008年12月6日星期六

Holiday 倒數


近排行街,周圍都開始有好濃厚嘅聖誕氣氛。係時候睇下仲有幾多日就放假喇!

喺 App Store 內有好多假期倒數嘅軟件。今次維京人介紹嘅就係呢個叫做 Holiday 嘅 App。

首先你可以設定你嘅假期表。香港嘅朋友緊係選擇 Hong Kong 啦。呢個 App 最好係可以同時顯時多個國家嘅假期,如果你喺 Multi-national Companies 裡面做,一次過顯示就非常有用。佢會顯示離有關嘅假期仲有幾多日,例如維京人寫呢篇 post 嘅時候離聖誕節就仲有 19 日,係時候要準備聖誕禮物咯。



點選每個假期,仲會顯示嚟緊五年嘅假期日子,及相關嘅簡單說明㖭。特別係農暦嘅節日都做到,好實用。例如點擊 Chinese New Year,2010 年嘅大年初一原來撞正情人節,咁大家安排節目嘅時候就更容易預算。

你仲可以自設假期,不過就要冇 repeat 嘅功能。例如有朋友每年暑假最後一個禮拜日會請假湊仔嘅,只可以花少少時間每年作分別設置,唔可以一次過設好晒。另外一個功能係,喺 Home Screen 嘅 Holiday icon 仲會顯示未來三十日就會到嘅假期。



呢個好用 App 要 US$1.99,各位自己衡量下值唔值得買啦。有興趣嘅朋友可以喺 App Store 以關鍵字 Holidays 作搜尋。或 click 呢度

呢個 App 同系列仲有一個叫 Birthdays 嘅軟件。功能與 Holiday 大同小異,只係唔係顯示假期而係朋友嘅生日。亦可以 click 呢度望一望。


2008年12月2日星期二

MM Park:港版 Bejeweled

相信大家都玩過 Bejeweled。呢個 game 主要係由唔少嘅方塊組成,每個方塊係一粒鑽石嚟嘅。只要將三粒相同嘅鑽石打橫或者打直連埋一齊,就會消失,然後畫面上方就會跌新嘅鑽石落嚟填番消失嘅鑽石。

喺 App Store 以關鍵字 "bejeweled" 作搜尋,會搵到一大堆大同小異嘅 iPhone game,真係唔知點揀好。原來香港公司亦有類似嘅制作,而且都好好玩㖭。呢個 game 就係今次要介紹嘅 MM Park 喇。



MM Park 基本上同所有嘅 bejeweled 冇分別,只係以動物代替鑽石咁啫。每版你都要令指定數量嘅動物消失,如果有關嘅動物你整嚟整去都消失唔到嘅話,隻動物會好抵死咁笑你,好過癮。隻 game 有三個 game mode,包括過關、限時過關、同埋對戰。咩話?對戰?係呀,好盞鬼㗎。維京人曾經喺呢度講過越嚟越多開發商開發 iPhone online game 或對打 game,呢個 game 亦食到呢個 feature。唔錯。

 

呢個 game 有個 mini 版,賣 $0.99。正版賣 $2.99,據聞係五折價。想下載,可以以關鍵字 "MM Park" 作搜尋,或 click 呢度
iPhone, iPhone Blog, iPhone App, App Store, Apple, iTunes, iTunes Store, mobile phone